syria-news.com
syria-news.comi
الصفحة الرئيسية
من نحن
اسرة الموقع
أكثر المواضيع قراءة
الإعلان في سيريانيوز
الإتصال بنا
المساهمات في هذا الباب لاتعبر بالضرورة عن رأي المركز
الشرطة في خدمة الشعب .. بقلم محمد خير
مساهمات القراء

الساعة الـ 8 صباحاً ... الشوارع مليئة بطلاب المدارس .. وزحمة سير مخيفة ...

الشرطي : صف عاليمين يا حبيب ...

المواطن : الله يسعدلنا هالصباح ... خير خير إنشاء الله ...


الشرطي ( بعصبية ) : أعطينا الأوراق ....

المواطن ( مستغرباً ) : خير انشاء الله .. بقدر اعرف شو مساوي .. والله ماشي نظامي و حاطط حزام الأمان .. شوفي ..

الشرطي : عم قلك أعطينا الأوراق ...

المواطن : براسي .. بس ليش .. !!!

الشرطي ( بكل برودة دم ) : مشان الفيميه ....

المواطن ( بسخرية )  : فيميه !!!! ... الله وكيليك ما ني حاطط فيميه .. هيك البلور طبيعي ...

الشرطي ( بفهمنة ) : لا مو طبيعي .. في نسبة فيميه بسيطة ...

المواطن : بس هي النسبة موجودة بكل البلورات ... ما بيحطو بلور بس . .لازم تكون في نسبة بسيطة مشان الشمس ..

الشرطي ( مرتبكاً ) : لا ما بيصير يكون في ولا درجة ... أنت هيك مخالف ...

المواطن : الله وكيلك ... والله ما فيها مخالفة ....

وبعد جدال يدوم خمس دقائق ... والشرطي بدأ يحس بخطئه ... يسكت الشرطي لمدة دقيقتين وهو يتأمل السيارة ومن ثم يقول فجأة وكأنة شاف شي : ومين  قلك أنو مخالفتك فيميه !!!!

المواطن ( وصارة درجة حرارتو ألف ) : لكان شو .. صرلك ساعة عم تقلي فيميه وما كنت تفهمني .. إذا مو فيميه شو ؟؟

الشرطي : لك لا مو فيميه ... مخالفتك غير هيك ...

المواطن :  شو !؟!؟!؟

الشرطي ( واثقاً ) : مخالفتك تشويه نمرة ...

المواطن :  بس النمرة طبيعية هيك ... أنا ما قربت عليها .. هادا كلو من عوامل الجو ... وما ني منتبه عليها ...

الشرطي ( ضاحكا ) مشكلتك ... أعطينا الأوراق وخلصني عند شغل ...

المواطن : طيب طول بالك والله ما منختلف ... مو محرزة المخالفة ... خلص شو بدك بيصير .. خود و عطي ...

الشرطي ( بعناد  ) : قلتلك عطيني الأوراق وخلصني شو ما عم تفهم ...

المواطن ( بعد ما حس إنو أكلها أكلها ) : طيب هي الشهادة شوفها وتأكد .. هاتها و خود الميكانيك ...

الشرطي ( وهو يكتب المخالفة  ) : لا تاكل هم شغلتها بسيطة كلها 200 ورقة ... ما فيها مشكلة ...

المواطن ( راضيا بقدره وهو يستلم الميكانيك من الشرطي ) : أي كتر خيرك الله يسلم أيديك ... فضلت علينا والله ... الله ييسرلك أمورك متل ما عم تيسر أمور هالعباد ...

يدير المواطن سيارته و ينطلق مسرعا وهو يردد ... \" الشرطة في خدمة الشعب \" ....

 


2010-09-23 10:00:31
شاركنا على مواقع التواصل الاجتماعي:



شارك بالتعليق
عجيب2010-09-23 20:06:33
هي القصص الكل بيعرفها
مو خافي على حدا هي القصص وكل الناس بما فيهم المسؤولين بيعرفو شو عم يصير. هي القصص متل السوس بالبدن! حلوة القصة مع اقتراحي بتغيير العنوان إلى: الشعب في خدمة الشرطة ههههه 
-سوريا
مواطن محشش كتير2010-09-23 19:43:38
نسيت قيمة المخالفة...
استاذ حوارك مع الشرطي جيد و لكنك نسيت "قيمة المخالفة" فبسبب قانون المرور الجديد اصبح الشرطي يقول لك قيمة مخالفتك حتى "تعرف كم عم بيوفر عليك لما بياخد الرشوة" هذا من ناحية و من ناحية ثانية حتى ما يخطر لك تعطيه 50 او 100 ليرة....عيب ...!!!! على الاقل 5% من قيمة المخالفة.....
-سوريا
fker2010-09-23 16:09:25
عوجا
والله ااذا غلي سعر الشرطي بسوريا وكان الدولار طالع ب500ليرة بتشتريه واي مخالفة يبلها ويشرب ميتها
سوريا
رايح نام وشوف منام2010-09-23 15:44:14
الله يرحم ايام زمان
قبل قانون السير العظيم كان الواحد منا يدفع للشرطي 25 ل.س أو 50 ل.س وهو عم يسبو ويدعي عليه للشرطي ولكن هلأ بعد تعديل قانون السير العظيم ورفع قيمة المخالفات لأرقام خيالية صار الواحد منا إذا الشرطي اخد منو 500 ل.س وكتبلو مخالفة بسيطة بيصير يدعيلو بالخير ويحكي عنو اديش انو هل الشرطي ابن حلال والله يكتر من أمثالو
سوريا
محاسب قانوني2010-09-23 12:12:22
فرنسا
الله يرحم إيامك يا فرنسا !!!
-الولايات المتحدة
someone2010-09-23 11:16:43
تسلم ايدك
مقال ظريف واسلوبو حلو,عندي رفيق صارت معو نفس القصة ولما الشرطي عجز يلاقي مخالفة بالسيارة (طبعا سيارة قديمة موديل كولت) قالو : مخالفتك هي تسيير سيارة بمظهر غير لائق
-سوريا